पर्यटनको विकास सरकारले मात्र गर्न सक्दैन् :मन्त्री पाण्डे

काठमाडौं पर्यटन तथा नागरिक उड्डयन मन्त्री बद्री पाण्डेले पर्यटन क्षेत्रको प्रसस्तै सम्भावना भएता पनि उपयोग भने गर्न नसकिएको बताएका छन् । 

मंगलबार काठमाडौंमा नेपाल पर्यटन बोर्डको २६औं बार्षिकोत्सव समारोहमा आयोजित कार्यक्रममा बोल्दै उनले पर्यटन क्षेत्र माथि पुग्नको लागि कुरा भन्दा पनि परिणाममुखी काम गर्न आवश्यक रहेको बताए । 

उनले भने,‘अहिले पर्यटन क्षेत्रको प्रशस्तै सम्भावना भएता पनि उपयोग गर्न सकेका छैनौ । एकदमै झिनो मात्रामा देशको जिडिपी र स्वरोजगारीमा न्यून योगदान रहेको छ । त्यसैले हामीले भन्ने कथाजस्तो वा पूराण वाचनजस्तो पर्यटन क्षेत्रबाट निकै माथि पुग्छौ भन्ने कुराहरु पटक पटक भन्छौ तर यसको कुनै अर्थ छैन् । यसका लागि हामीले परिणाम ल्याउनुपर्छ ।’

साथै उनले पर्यटन क्षेत्रको विकासका लागि सरकारको तर्फबाट मात्र सम्भव नहुने भन्दै यसका लागि सरकार र निजी क्षेत्रलाई जोडेर काम गर्न नेपाल पर्यटन बोर्ड खडा भएको बताए । 

उनले भने,‘अब पर्यटन क्षेत्रको विकास गर्न केवल सरकार मात्रै सक्षम छैन् । यसका लागि निजी क्षेत्र जोडिनुपर्छ । सरकार र निजी क्षेत्रलाई जोडेर एउटा सम्बोधनको काम गर्ने एउटा संस्था चाहिन्छ त्यो संस्था नेपाल पर्यटन बोर्ड हुनसक्छ ।’